Печени компири со пармезан, сув босилек и путер, во форма на роза, супер крцкви однадвор, но меки и превкусни во средината. Како да не ви се допадне такво нешто? Плус многу е лесно да се подготват и ви требаат само неколку состојки кои најверојатно веќе ги имате при рака.
ЗА РЕЦЕПТОТ
Порции: 8 порции
Време за подготовка: 10 минути
Време за печење: 45 минути
СОСТОЈКИ
- ~400g. компири
- ~50g. пармезан,
- ~40g. стопен путер
- 1 лажичка сув босилек, оригано или мајчина душица
- сол и бибер по вкус
- масло за намрсување на тавчето
НАСОКИ ЗА ПОДГОТОВКА
- Загрејте ја рерната на 200C.
- За подготовка на овој рецепт, најпрво излупете и исецкајте ги компирите на кругови. Најдобро е со алатка за сецкање или со нож, но внимавајте да бидат најтенки што може. Моите беа околу 3-5мм.
- Во исецканите компири додадете го изренданиот пармезан, стопениот путер и зачините. Измешајте за сите парчиња да бидат еднакво зачинети.
- Намачкајте ја со растително масло тавата за мафини и во секоја чашка ставете купче компири убаво наредени круговите еден врз друг.
- Печете околу 15 минути, додека компирите не добијат малку боја, потоа покријте ги со алуминиумска фолија и продолжете да ги печите уште половина час се додека внатрешноста на компирите да биде добро испечена. Тоа ќе го проверите лесно со нож, ако боцнете во средината на купчето со компири и ножот лесно навлегува, значи дека се добро печени.
- Послужете ги топли. Уживајте!
За повеќе детали како да го подготвите овој рецепт, погледнете го видеото подолу.
