Сакам леб и сум месела многу лебови во текот на годините, но кога станува збор за интегрален леб… секогаш се двоумев. За воља на вистината не е лесно да наидеме на интегрален леб кој воедно е вкусен – мислам на вистински интегрален леб, а не некој во кој интегрално брашно има двојно помалку од бело брашно.
Но сега, проблемот е решен – овој интегрален леб е направен од 100% интегрално брашно, плус семиња кои му даваат екстра вкус и нутритивност. Има пријатна текстура и вкус, а се подготвува за само еден час.
ЗА РЕЦЕПТОТ
Порции: 10 порции
Време за подготовка: 15 минути
Време за печење: 30 минути
Време за нараснување: 30 минути
СОСТОЈКИ
- 300 g. интегрално брашно
- ~200 ml. топла вода
- 7 g. сув квасец
- 1/2 лажичка сода бикарбона
- 1/2 лажичка сол
- 1 лажица шеќер
- 1 лажица маслиново масло
- 2-3 лажици јогурт
- 2 свежи јајца
- ~1 лажица семки од тиква (половина во тестото, другите врз лебот)
- ~1 лажица сончиглед (половина во тестото, другите врз лебот)
- ~1 лажица афион (половина во тестото, другите врз лебот)
- ~1 лажица сусам (половина во тестото, другите врз лебот)
НАСОКИ ЗА ПОДГОТОВКА
- Започнете со активирање на квасецот во малку топла вода и шеќер.
- Штом квасецот се активира, додадете го во брашното заедно со содата, солта, јајцата, маслото и половина од семињата. Може да го додадете во овој момент и јогуртот или подоцна како што направив јас во видеото – нема да смени ништо.
- Измешајте ги состојките со дрвена лажица додавајќи вода малку по малку се додека не постигнете соодветна густина… тестото треба да е влажно, лепливо, но треба да биде доволно густо за да држи исправено дрвена лажица кога би ја ставиле во него.
- Покријте го тестото со пластична фолија и оставете да нарасне околу 15тина минути.
- Префрлете го тестото на набрашнета површина и месете го кратко (околу 5 минути) без оглед на неговата густина. ќе ви се чини премногу влажно и лепливо за месење, но не додавајте многу брашно, само месете без оглед на густината.
- Префрлете го тестото во тава за печење и израмнете го со влажни прсти. Оставете да одстои уште 15тина минути.
- Посипете ги останатите семиња врз тестото и печете околу 30 минути во загреана рерна на 200С.
- Оставете да се излади пред да си исечете парче. Уживајте!
За повеќе детали како да го подготвите овој рецепт, погледнете го видеото подолу.
